Appelsínugljáður lambavöðvi Meyr og gómsætur lambavöðvi, gljáður með appelsínumarmelaði og bakaður í súr-sætri appelsínu-balsamedikssósu. Uppskriftin er ættuð frá Ástralíu. Í staðinn fyrir lambavöðva mætti vel nota kindainnralæri, það er ekki síðra.

Apríkósugljáðar lambalærissneiðar Girnilegar grillaðar lambalærissneiðar með mildri barbecue-sósu með ávaxtakeim. Þennan apríkósukryddlög má líka nota á t.d. framhryggjarsneiðar og jafnvel kótelettur en þeim er þó mun hættara við að brenna. Sósuna má líka nota með grilluðu lambakjöti sem kryddað er á annan hátt og jafnvel með forkrydduðu grillkjöti.

Arabískar lambakótelettur Lamba- og kindakjöt er mikið borðað í flestum Arabalöndum, allt frá Marokkó austur til Saudi-Arabíu og Íraks, og er algengast að kjötið sé soðið í ýmiss konar pottréttum eða grillað. Það er gjarna töluvert mikið kryddað og krydd eins og kóríander, kummin, kanell og chili eru algeng.

Arabískt lambalæri með grænmeti Arabar kjósa að hafa lambakjötið gegnsteikt og þess vegna er steikingartíminn sem gefinn er upp hér nokkuð langur. Auðvitað má líka steikja lærið mun skemur ef þess er óskað að það sé bleikt í miðju.

Armensk lifur með papriku og tómötum Þessi lifrarréttur, sem ættaður er frá Armeníu, er mjög einfaldur en góður. Lifur og grænmeti er skorið í bita, sett í ofnskúffu, kryddað og bakað stutta stund.

Bakað lambalæri með graskeri, rósakáli og kryddjurtum

Barbecue-lambarif Mjög einföld uppskrift þar sem ódýrt hráefni er gert að hreinasta góðgæti - það er að segja fyrir þá sem langar til að naga bragðmikil og brakandi rif - það er hægt að grilla rifin hvort heldur sem er í ofninum eða á útigrillinu.

Basil- og hunangshjúpuð lambakóróna með kumminbættum augnbaunum og basilpestói Okkar frábæra lambakjöt hentar við ýmis tækifæri og er sannarlega kjörið hráefni í veislumat.  Hér er uppskrift að girnilegum rétti sem sómar sér vel í hvaða veislu sem er.  Höfundur.  Úlfar Finnbjörnsson, matreiðslumeistari. Uppskriftin birtist í Gestgjafanum 3. tbl. 2007.

BBQ-kryddaðar lambagrillsneiðar með BBQ-sósu Girnileg uppskrift úr uppskiftasafni Úlfars Finnbjörnssonar sem hæfir þessu frábæra hráefni og hentar vel við ýmis tækifæri sem birtist í 9. tbl. Gestgjafans 2008.

Berja- og villikryddað lambalæri Íslenskt lambakjöt, kryddað með villijurtum og berjum til að fá hið eina sanna fjallabragð. Hér er notuð blóðbergsteblanda úr Aðaldal en einnig má nota ýmsar villtar kryddjurtir, innlendar eða erlendar.

Blóðmör Blóðmör og lifrarpylsa er ódýr og góður íslenskur matur, ekki bara á haustin, heldur allt árið. Hér er hefðbundin, einföld blóðmörsuppskrift sem allir ættu að geta farið eftir. Auðvitað má svo bragðbæta blóðmörinn á ýmsan hátt, t.d. með kryddi eða rúsínum.

Chili-apríkósugljáður lambahryggur Uppskriftir að lambahrygg í erlendum matreiðslubókum eru oftar en ekki miðaðar við að hryggurinn (eða hluti hans) sé sagaður í tvennt eftir endilöngu og þá er hryggsúlan líka oftast fjarlægð. Við þetta fást kjötstykki sem er auðveldara að matreiða og skera en þegar hryggurinn er eldaður á hefðbundinn hátt. Oft er hægt að fá þetta gert í kjötborði verslunarinnar en ef til er þungur og góður hnífur er ekki sérlega vandasamt að höggva hrygginn sundur heima í eldhúsi.

Chilikryddað lambakebab Chilisósan sem notuð er til að marinera kjötið er fremur mild og því ættu allir að geta borðað réttinn, líka þeir sem ekki eru gefnir fyrir sterkkryddaðan mat.

Chilikryddaðar lambakótelettur Þessar kótilettur eru smurðar með sterku kryddmauki og látnar liggja nokkra stund áður en þær eru grillaðar eða steiktar. Þær eru því nokkuð krassandi en það fer þó eftir því hvað chilisósan í marineringunni er sterk.

Chilkryddað grillað lambalæri Þetta er réttur fyrir þá sem vilja hafa lambalærið sitt dálítið krassandi. Nota má jalapeño-pipar úr krukku í kryddlöginn; það ásamt hvítlauk og sinnepi ætti að gera réttinn vel ,,heitan".

Eldsteiktar lundir í rjómasósu Lambalundir eru að margra áliti allra besti bitinn af lambinu. Þær eru mjög meyrar og mildar og þurfa afar stutta eldun. Hér eru þær snöggsteiktar, flamberaðar með brandíi (einnig má nota t.d. viskí eða annað áfengi) og síðan búin til rjómasósa.

Fjallagrasablóðmör Fjallagrös voru mikið notuð í blóðmör áður fyrr og komu í stað mjöls að miklu leyti. Enn er fjallagrösum stundum bætt út í blóðmör, enda eru þau mikið hollmeti.

Fjallalamb á veisluborðið Ljúffengt lambalæri á veisluborðið, kryddað með villtum íslenskum kryddjurtum, t.d. blóðbergi. Bragðið verður einstaklega milt og gott en hefur um leið þennan íslenska jurtakeim sem allir kunna að meta.

Fjárhirðapottréttur frá Baskalandi Þessi réttur er upprunnin í Baskahéruðum Norður-Spánar og ber ýmis einkenni þess svæðis, inniheldur m.a. paprikur, rauðvín, hvítlauk, kryddjurtir og svolítið chili. Hann er einkar bragðmikill en þó ekki sterkkryddaður.

Fljótlegt indverskt lambakarrí Þótt þessi réttur kallist karrí er ekki notað neitt karríduft í hann - karrí þýðir í rauninni ,,sósa" og Indverjar nota ekki tilbúnar karríblöndur, heldur blanda saman ýmsum tegundum af kryddi. Þetta er mjög einföld og fljótleg útgáfa af indverskum karrírétti.

Framhryggjarfillet með grilluðum tómötum Þykkur og vel fitusprengdur framhryggjarvöðvi (fillet) hentar sérlega vel til grillsteikingar. Gott er að leggja hann nokkra stund í kryddlög úr olíu, sítrónusafa og kryddjurtum eins og hér er gert og grilla hann síðan hæfilega lítið. Grillaðir tómathelmingar eru mjög góðir með en einnig mætti grilla annað grænmeti, svo sem eggaldin, papriku og kúrbít.

Framhryggjarsneiðar með hunangshjúp Gómsætar framhryggjarsneiðar í heimagerðri barbeque-sósu. Rétt er að hafa í huga að kjötið getur verið fljótt að brenna vegna þess hve sæt sósan er og það mætti líka strjúka hana mjög vel af kjötinu áður en það er sett á grillið og pensla það svo aftur síðustu mínúturnar til að fá góðan hjúp án þess að kjötið brenni.

Franskur lambapottréttur Franskur sveitamatur af bestu gerð - lambakjöt, grænmeti, rauðvín og kryddjurtir. Best er að elda réttinn í potti sem stungið er í ofninn en einnig má sjóða hann uppi á eldavélinni.

Fyllt lambalæri á grillið Fyllt lambalæri af grillinu er frábær veislumatur. Hér er notuð fylling úr fetaosti, sólþurrkuðum tómötum, furuhnetum, pestói og kryddjurtum. Best er að úrbeina lærið þannig að leggjarbeinið sé skilið eftir og lærið haldi alveg lögun.

Gljáðir lambaskankar Lambaskankar eða leggir eru ódýr en góður biti sem best er að elda lengi við fremur vægan hita. Hér eru þeir gljáðir með barbecuesósu, bragðbættri m.a. með hvítlauk og kryddjurtum.

Glóðaðar lambalærissneiðar með banana Það er kannski svolítið karabískur kemur af þessum lærissneiðum, þar sem saman fara bananar, sítrónur og beikon, en gómsætt lambakjötsbragðið er þó það sem mest ber á.

Glóðarsteikt kaffikryddað lamb Kaffi - eða öllu heldur kaffilíkjör - er kannski dálítið óvenjulegt krydd á lambakjöt en á þó ljómandi vel við, til dæmis í grillkryddlög.

Góðgæti drykkjurútsins Ekki er vitað fyrir víst af hverju rétturinn hefur þetta nafn (á frummálinu kallast hann O mezes tou bekri), en hann er ljómandi góður, líka fyrir bindindisfólk. Það er hægt að bera hann fram sem pinnamat, þar sem allt er skorið í fremur litla bita og borið fram í sósunni.

Grillað lamb á spjóti með ananas og mangó Það er ekkert íslenskt sumar án íslensks lambakjöts á grillið. Hérna er ljúffeng uppskrift eftir Úlfar Finnbjörnsson sem birtist í grillblaði Gestgjafans 2008.

Grillað lamba-prime í BBQ-sósu Það er ekkert íslenskt sumar án íslensks lambakjöts á grillið. Hérna er ljúffeng uppskrift eftir Úlfar Finnbjörnsson sem birtist í grillblaði Gestgjafans 2008.

Senda á Facebook