Nokkrar kaldar sósur sem henta með grilluðu lambakjöti:
Tzatziki
10 cm bútur af gúrku • 1 lítil dós hreint KEA-skyr • 2-3 hvítlauksgeirar, saxaðir smátt • 1/2 tsk oregano • 1 msk ólífuolía • nýmalaður pipar • salt
Gúrkan rifin, sett í sigti, dálitlu salti stráð yfir og látin standa í hálftíma. Þá er eins mikill safi pressaður úr henni og unnt er og síðan er henni hrært saman við skyrið, hvítlaukinn og olíuna og bragðbætt með pipar og salti eftir smekk. Sósan geymd í kæli í a.m.k. hálftíma. Borin fram t.d. með grilluðum kótelettum eða lambafile.
Sítrónu-jógúrtsósa
1 dós hrein jógúrt (nota má skyr eða sýrðan rjóma)• rifinn börkur af 1 sítrónu • 1 msk sítrónusafi, nýkreistur • 1 tsk kummin (cumin), malað • 1 tsk hunang eða sykur • nýmalaður pipar • salt
Allt hrært saman og látið standa í kæli í a.m.k. 1 klst. Borið fram með alls konar grilluðu lambakjöti.
Indversk ananas-raita
1 lítil dós ananaskurl • 1 lítil dós hreint KEA-skyr • 1 tsk garam masala (eða mild karrísósa eftir smekk) • 2 msk ferskt mintulauf, saxað (má sleppa) • nýmalaður pipar • salt
Safinn látinn renna vel af ananasinum og síðan er allt hrært vel saman. Borið fram t.d. með sterkkrydduðum grilluðum kótelettum eða öðru vel krydduðu kjöti.
Mintupestó
2 msk furuhnetur• hnefafylli af fersku mintulaufi • 2 hvítlauksgeirar, saxaðir • 2 msk nýrifinn parmesanostur • nýmalaður pipar • 1 dl ólífuolía
Hneturnar ristaðar á þurri pönnu þar til þær eru rétt farnar að taka lit en þá eru þær settar í blandara eða matvinnsluvél ásamt mintulaufi, hvítlauk, parmesanosti og pipar. Vélin látin ganga þar til allt er komið í mauk og síðan er olíunni þeytt saman við smátt og smátt. Sósuna má nota strax eða geyma hana í 2-3 daga í ísskáp. Borin fram t.d. með grilluðu lambalæri eða lambalundum.
Hoisin-chilisósa
2 dl hoisin-sósa • 1 dl chilisósa, sterk eða mild eftir smekk
Sósurnar settar í skál og hrærðar saman. Þessi sósa, sem er mjög vinsæl víða í Suðaustur-Asíu, er góð t.d. með grilluðum lambarifjum eða kótelettum.
Hnetusósa
150 g hnetusmjör, gjarna grófmalað (crunchy) • 1 dl mild tómatchilisósa (Heinz) • 3 msk sojasósa • 1 msk olía • 1 tsk worcestersósa • safi úr 1/2 sítrónu • 2 tsk túrmerik • nýmalaður pipar • salt • skvetta af ananassafa
Allt sett í skál og hrært vel saman. Sósan e.t.v. þynnt með svolitlum ananassafa. Ef á að bera hana fram heita er allt sett í pott ásamt 2 dl af ananassafa, hitað að suðu og látið malla í nokkrar mínútur, þar til sósan er hæfilega þykk.
Hvítlaukssósa4-5 hvítlauksgeirar, pressaðir • 2 dl majónes • 1 dl ab-mjólk • 2 msk. sítrónusafi • 1 msk. hunang
• salt • nýmalaður svartur pipar
Setjið allt í skál og blandið vel saman. Kælið.
|
